IChiefs izombolekisa uRadebe ukuze amgcine ematasa

UMDLALI osemncane weKaizer Chiefs, uSabelo Radebe, kuthiwa uzobolekiswa kuMotsepe Foundation Championship ngesizini ezayo.

FUNDA FUTHI: IChiefs iphelelwa wumdlandla kuJali ngemuva kwesigameko ‘sokuphuza’ kuSundowns

URadebe ubengasitholi isikhathi sokudlala eqenjini lokuqala laMakhosi, yize engomunye wabadlali abayizikhonzi eqenjini elithuthukiswayo elethwe ngumqeqeshi u-Arthur Zwane.

Lo mdlali udlalwa kakhulu ebhentshini, kodwa isikhathi sokudlala besishoda.

Umthombo uthi uRadebe bekumele ashiye iChiefs ngewindi lokudayiselana ngabadlali ngoJanuwari kodwa abaphathi noZwane babone kungcono ukuthi alwele indawo eqenjini elizoqala umdlalo.

FUNDA FUTHI: UMbuyane udalula ukugxambukela kwabaphathi bePirates ekukhethweni kwamaqembu

“Ungomunye wabanethalente abaqhamuke ekuthuthukisweni, kodwa akakakulungeli ukuba njalo eqenjini lokuqala,” kusho umthombo.

“Bamnike isikhathi esiningi sokulwela isikhundla kodwa akawini. Kukhona okushodayo emdlalweni wakhe. Akafani noMduduzi (Tshabalala), lowo uzethemba kakhulu yikho okumsizayo. USabelo akunjalo, uyesaba ukudlala. Yingakho (abaphathi) bethathe isinqumo sokumbolekisa.”