Riaan 
UKurt Lentjies, osanda kungena esikhundleni sikaMorgan Mamilla njengomqeqeshi weChippa United, uthi uthole ukwamukelwa ngemfudumalo kubadlali.
FUNDA FUTHI: ISundowns yezihlabani ezinhlanu yenza iRoyal AM isicashe
ULentjies ubuyela esihlalweni esishisayo seChippa ngemuva kokuthi umnikazi weqembu uSiviwe “Chippa” Mpengesi enqume ukudedela uMamilla kulandela inqwaba yemiphumela engemihle.
UMamilla uxoshwe ngemuva kokwehlulwa ngo 2-1 yiSwallows FC emdlalweni weDStv Premiership, nakuba ekwazile ukuholela iqembu ku-last 16 yeNedbank Cup ngemuva kokuhlula iPolokwane City ngo 3-1 sekukhahlelwa amaphenathi kulandela ukudlala ngokulingana ngo 1-1.
ULentjies uthi kuyamjabulisa ukuthi uyezwana nabadlali.
“Kusobala ukuthi ukwamukelwa kuhle njalo. Abantu bangathi ngiyingxenye yefenisha ngoba sengineminyaka emihlanu ngikhona (kwiChippa). Kodwa kuhluke kancane, abadlali abahlukene, samukelane kahle, bayayiqonda indlela engisebenza ngayo, ngiyayiqonda indlela abasebenza ngayo futhi sesiyazana kahle,” kusho uLetjies ekuqaleni kwaleli sonto.
Uma ubheka isibalo sabaqeqeshi asebefike badlula kuleli qembu esikhathini esifushane, abaningi bangangabaza isinqumo sikaLentjies sokubuyela kuleli qembu elizinze eGqeberha.
FUNDA FUTHI: Iphini lomqeqeshi wePirates liheha izimfuno kuChampionship
Kodwa, uLentjies akakhathazeki nakancane futhi uthi umqondo wakhe ugxile ekufezeni izinhloso zeqembu, wengeza ngokuthi wonke umsebenzi wokuqeqesha kwiPremier Soccer League (PSL) unobuqili.
“Akuwona umsebenzi olula (ukuqeqesha kuChippa), wonke umsebenzi emaqenjini angu-16 ePSL uyakhohlisa, akusho lutho ukuthi yiliphi iqembu. Kimina, umsebenzi wami uwukufinyelela igunya leqembu lebhola futhi kunjalo. Angibheki umqashi wami, kodwa ngibheka ukuthi yini engingayenza.”
