Riaan 
Izikhukhula ezidalwe yizimvula ezinamandla zihlasele izifundazwe ezimbili zaseTurkey ezicekelwe phansi ukuzamazama komhlaba okwenyanga edlule, kwashona okungenani abantu abangu-14 kwandise nosizi ezinkulungwaneni ezasala dengwane, kusho izikhulu.
UNgqongqoshe Wezangaphakathi uSuleyman Soylu uthe amathimba abatakuli asathungatha abantu abahlanu okubikwe ukuthi badukile ezindaweni ezintathu ngemuva kokuthi izikhukhula ziphendule imigwaqo esifundazweni i-Adiyaman neSanliurfa zaba imifula, zakhukhula izimoto, izindlu ezichithiwe kanye nezinkambu ezicwile ezikhoselisa abasinde ekuzamazameni komhlaba.
Kushone okungenani abantu abangu-12 eSanliurfa, okuhlanganisa nezakhamuzi ezinhlanu zaseSyria izidumbu zazo ezitholwe endlini engaphansi egcwele izikhukhula kanye nabanye abantu ababili abashonele ngaphakathi evenini ebivaleleke endaweni engaphansi komgwaqo.
E-Adiyaman, abantu ababili baminza ngemuva kokukhuphuka kwamanzi akhukhula ikhaya lebhokisi elikhoselise umndeni wabasinde ekuzamazameni komhlaba.
Izithombe zikamabonakude ezivela eSanliurfa zikhombise amanzi ezikhukhula egudla umgwaqo futhi eshanela izimoto nemfucumfucu.
Abatakuli, besebenzisa intambo, babonakale bephakamisa owesilisa bemyisa endaweni ephephile endaweni engaphansi kwamanzi.
Kwenye indawo, omunye umuntu ukhishwe emanzini abantu ababelenga ishidi elisontiwe efasiteleni lesakhiwo.
“Ngesikhathi ngiphaphama, izindlu zethu bezingaphansi kwamanzi,” kusho uMelek Yildirim etshela i-Anadolu Agency engaphansi kukahulumeni ngemuva kokutakulwa emgwaqeni owawugcwele amanzi eSanliurfa ngesikebhe.
“Isimo asisihle.”
UNksz Yildirim uthe: “Sesikhohlwe nokuzamazama komhlaba.
Abantu abaningana basizwa emakamu lapho abasinde ekuzamazameni komhlaba babekhosele ematendeni.
Iziguli ziphinde zasuswa egunjini labagula kakhulu esibhedlela eSanliurfa, kubika iHaberTurk.
Amanzi alwayo abangela ukuba ingxenye yomgwaqo omkhulu esifundeni idilike.
Inhlangano ebhekelele izinhlekelele eTürkiye ithe bangaphezu kweshumi abatshuzi ababambe iqhaza emizameni yokuhlenga esifundazweni ngasinye kulezi ezimbili.
Ukuzamazama komhlaba okuyisilinganiso esingu-7.8 magnitude kwagadla izingxenye zeTürkiye naseSyria ngomhlaka-6 February, kwashona abantu abangaphezu kuka-52,000 – iningi labo eTürkiye.
Izakhiwo ezingaphezu kuka-200 000 eTürkiye zabhidlika noma zalimala kakhulu.
