Riaan 
UZOPHELA izaba umqeqeshi waMaZulu FC, uRomain Folz, njengoba iqembu lakhe liqhubeka nokuqhulula izintambo kuDStv Premiership.
OLUNYE UDABA: URiveiro unethemba elikhulu ngoMakgopa kuPirates yize engenaso isikhathi sokudlala
Iqembu laseThekwini lithathwe yiStellenbosch FC kwabahlanza ngoLwesihlanu ebusuku, layishaya ngo 2-0 nokwengeza ezinkingeni zeFolz.
Lo mqeqeshi osemncane ubukeka ephumile ekujuleni wasola ukuhlulwa kwabo ngenxa yokungabi namagoli phambili.
“Isiwombe sethu sokuqala besisihle. Sakhe amathuba amahle okushaya amagoli,” kusho lo mqeqeshi odabuka eFrance neMorocco ngemuva komdlalo.
Kokunye, ishaye ipali kanti enye ibhekene nonozinti ngesikhathi kusangu 0-0.
“Kodwa ngemuva kwalokho sangena ogibeni lwabo. Sasazi ukuthi bazozuza kulo lonke ushintsho.
“Futhi uma sesishiye isikhala ngemuva, uyazi ukuthi bazobhekana nalokho. Ibhalansi yethu esiwombeni sesibili ibintekenteke kakhulu.
“Ngakho-ke manje kumayelana nokuthi sithole ifomula efanele yokuqinisekisa ukuthi sinokulinganisela ezimweni ezinjalo,” kwengeza uFolz.
Uthe uStellies unohlelo olulodwa futhi bayazi ngalo, kodwa basabavumela ukuthi balenze ngendlela abafuna ngayo.
“Ngokusho kwabo sebewine uhlelo olulodwa ababambelele kulo. Kodwa sasazi ngakho.
“Futhi sibanikeze ithuba lokuthi benze uhlelo lwabo, balwenze kahle.
“Ibanga lethu lokuthi singabavimba kanjani abantu ukuthi bangene emkhathini belikhulu kakhulu,” kusho uFolz.
Ukuhlulwa kushiye Usuthu lusondelene nezembe kunamaqembu amane aphezulu okujutshwe uFolz ukuwafinyelela kule sizini.
Ayashabalala amaphupho emiqhudelwano yeCaf AmaZulu
Isele ngamaphuzu ayisikhombisa kuMaritzburg United esendaweni ka-15. Leli banga lingase linciphe uma iMaritzburg inqoba iKaizer Chiefs ngoMgqibelo kusihlwa.
Usuthu selusele ngamaphuzu angu-11 kuSuperSport United esendaweni yesibili nayo engase inyuse ibanga uma inqoba ku-Orlando Pirates.
Abaphathi baMaZulu sebephumele obala ngesifiso sabo sokuthi leli qembu libuyele emiqhudelwaneni yeCaf, kodwa uFolz ubukeka edonsa kanzima ukuze kwenzeke lokho.
Ukuze kwenzeke lokhu kumele iqede isithathu noma ngaphezulu kuligi njengoba isiphumile kuNedbank Cup.
UFolz ukugcizelele ukuthi ukushaya amagoli kuseyisithiyo ekuqhubekeleni phambili kweqembu lakhe kule sizini.
OLUNYE UDABA: Uvalo lokwehlelwa yizembe luyakhula kuSwallows ngemuva kokuhlulwa yi-Arrows
“Nakhona kubuyela odabeni olufanayo ebesinalo muva nje. Ngamathuba esiwatholile bekufanele sibe ngabokuqala ukushaya amagoli,” usho kanje.
AmaZulu anomgadli ohlonishwayo kuligi noLehlohono Majoro, Gabadinho Mhango noBongi Ntuli.
