Riaan 
UMQEQESHI we-Orlando Pirates, uJose Riveiro, usegxilise amehlo akhe ekulweleni ukunqoba DStv Premiership ngesizini ezayo.
FUNDA FUTHI: IWydad iqeda iphupho leSundowns leChampions League
Lokhu kusho ukuthi iPirates iqede iqinile emkhankasweni ka-2022/23, okwenza leli qembu lagcina lisendaweni yesibili esicongweni seligi futhi lakwazi ukungena kuCaf Champions League.
AmaBhakabhaka aqede umkhankaso wawo engemuva kwamaBrazilians ngemuva kokuqoqa amaphuzu angu-54 emidlalweni engu-30 kulandela ukudlala kahle kakhulu kuMaZulu, aqumba phansi leli qembu elizinze KwaZulu-Natal ngo 4-0 emdlalweni wokugcina weligi kule sizini.
Amagoli kaThabiso Monyane, Relebohile Ratomo, Monnapule Saleng noKabelo Dlamini yiwona abeke obala lezi zinkunzi zaseSoweto zibhekene noSuthu.
“Akukona konke esikufunayo (ukuqeda endaweni yesibili). Besingalwelanga ukuba endaweni yesibili, kodwa asikwazanga ukubekela ompetha abakhona isizini yonke. Sizothatha indawo yesibili manje. Kodwa, sizobuya ngesizini ezayo,” kusho umqeqeshi wePirates ngemuva komdlalo.
“Kufanele siphonsele inselelo wonke amaqembu ngesizini ezayo, singagcini iSundowns kuphela. Kukhona lapho okumele sithuthuke khona futhi sidinga ukuqhubeka nokulwa. Wonke umuntu uzoqala ngamaphuzu awuziro (ngesizini ezayo) kanti uma sikwazile ukuncintisana futhi sidlale yonke imiqhudelwano ngothando olufanayo, nginesiqiniseko sokuthi sizokwenza kahle.”
FUNDA KABANZI: IPirates izongena kwiChampions League ngemuva kokuqumba phansi AmaZulu
URiveiro utuse abadlali bakhe ngomsebenzi onzima abawenzile isizini yonke. Futhi uthi ukukwazi ukungena kuChampions League kubalulekile eqenjini.
“Ngiyababongela abadlali bami. Kube yisizini enzima, kodwa sikhombisa izimpawu ezinhle ngekusasa. Sikwazile ukufaka iPirates kuChampions League ngesizini ezayo okuwumqhudelwano okufanele ngabe singenela kuwona minyaka yonke,” engeza.
“Sizobungaza ukunqoba ngoba esikwenzile kubalulekile. Futhi ngoMsombuluko, sidlulisela ukugxila kwethu kowamanqamu [Nedbank Cup final against Sekhukhune United] ngoba sithemba ukwenza kahle.”
IPirates izobhekana noSekhukhune eLoftus Versfeld Stadium ngoMgqibelo.
Lona kuzobe kuwumhlangano wesithathu phakathi kwePirates noSekhukhune kulo mkhankaso. Emidlalweni yabo emibili edlule, uBabina Noko wehlule iBucs ngo 2-0 emzuliswaneni wokuqala weligi, ngaphambi kokuthi badlale ngokulingana ngo 1-1 emasontweni amabili edlule.
